Grazas por sumar a túa peza

Grazas por colaborar coa campaña #SempreLucas.

A túa achega non é só un xesto simbólico. Neste momento, axuda de forma real a soster o peche da Lucas Roller Week 2026 e a responder, con responsabilidade, aos compromisos que aínda quedan pendentes tras a celebración do evento.

A edición de 2026 xa pasou. Foi unha edición moi complexa, con moitas dificultades de última hora e cun resultado económico máis duro do previsto. Non queremos converter esas dificultades en escusas nin sinalar a ninguén. O que si queremos facer é afrontalas con seriedade, ordenar os pagamentos pendentes e coidar ás persoas que fixeron posible que a competición saíse adiante.

Cada peza que se suma permítenos avanzar un pouco máis: cubrir gastos pendentes, apoiar o traballo de quen estivo detrás do evento e manter vivo o proxecto que naceu para lembrar a Lucas Seijo a través do deporte, da comunidade e do agarimo compartido.

Sabemos que detrás de cada achega hai confianza. Por iso queremos darche as grazas de forma sincera. O teu xesto axúdanos nun momento difícil e lémbranos que #SempreLucas non é só unha campaña: é unha rede de persoas que decide seguir empurrando cando o camiño se complica.

Grazas por formar parte deste camiño.